Wednesday, July 18, 2012

ගැහැණු ලොවක සිරකරු... 6 කොටස

මුල් කොටස් සඳහා
5 කොටස
**********************************************************************************

උඹට මම......... ඈගේ කෙස්වැටිය අතහැර පහරක් එල්ල කිරීමට සූදානම් වත්ම හුරුපුරුදු කටහඬක් මා අමතනවා ඇසිණි.

අශාන්.....

මා වහා පිටුපස හැරී බැලුව් විශ්මයෙන් යුතුවයි.විශ්වාස කල නොහැකි වුවත් ඒ ඇයයි.දෙනෙත් අදහාගත නොහැකිව මා ස්වල්ප වෙලාවක් ඈ දෙස බලා සිටියේ මෙය කෙසේ සිදුවුණිදැයි සිතාගැන්මට නොහැකිවයි.කෙසේ නම් විශ්වාස කරන්නද රෝහලේ සිටි ප්‍රධාන වෛද්‍යවරිය යානය තුලට පැමිණ සිටින වග.

මේක වෙන්න බැහැ...... මම සෙමින් මිමිණුවෙමි

ඇය සිනාසෙන අතරතුර මා හට නෙතින් සන් කලේ පිටුපස බලන ලෙසටයි.මම වහා පිටුපස හැරී බැලුවෙමි.සෙබලිය ඇගේ බැමි නිදහස් කරගෙන සිටියාය.... කල යුත්තේ කුමක්දැයි මා සිතීමටත් පෙර සෙබලිය මා හට පහරක් එල්ල කර පුටුවට මාගේ දෑත් දෙපය ගැටගැසීමට පටන් ගත්තේ මා අසරණ කරවමිනි.තවමත් කිසිවක් සිතාගත නොහැකිව මා වෛද්‍යවරිය දෙස නෙත් යොමා සිටියේ ඇගෙන් පිළිතුරක් අපේක්ෂාවෙන්.

මෙයා දැන් මගෙයි අයුමි..... යානයේ පාලනය ඔයා බාරගන්න....

හ්ම්ම් ඊට ඉස්සෙල්ලා පොඩි ගනුදෙනුවක් තියෙනවා බේරගන්න

ඒ සමගම මාගේ මුහුණ හරහා දැඩි පහරක් එල්ල විණි.මොහොතකට මාගේ දෙනෙත් නිලංකාර වෙන අයුරක් මට දැනෙන්නට වූයේ දැඩි වේදනාවක්ද සමගයි.කොපමණ ප්‍රහාර ලැබුවත් සතුරා ඉදිරියේ අසරණ වීම මා හට කල නොහැක්කක්.අවඥා සහගත හිනාවක් මා නැවත ඇය වෙත යොමුකලේ කිසිදු වේදනාවක් නොහඟවමින්....

හමුදා නිලධාරිණියක්ව ගැට ගහලා හිර කරන්න කලින් දෙපාරක් හිතන්න වෙයි මීට පස්සේ....

යැයි පැවසූ ඈ මා දෙස කුරිරු බැල්මක් හෙලමින් කුටියෙන් පිටවිණි.

ඉතින් අශාන්.... හිතුවේ නෑ නේද ආයෙ හමුවෙන්න ලැබෙයි කියලා....

නෑ කොහෙත්ම නෑ..... දිගු සුසුමක් හෙළමින් ඈ දෙස නොබලා මම පිළිතුරු දුනිමි.

ඔයාගේ හිත පාට නොකරපු චිත්‍රයක් වගේ තිබුනේ අශාන්.ඕනම කෙනෙක්ට පුළුවන් ඒ චිත්‍රය පාට කරලා වෙනස්ම නමක් දෙන්න.ඔයාට මෙතනත් වෙලා තියෙන්නේ ඒකයි.ඔයා වැටිලා ඉන්නේ වැරදි අතකට.......

මම දන්නවා මම කරන දේ......

නෑ ඔයා දන්නේ නෑ අශාන්.... ඔයා මෙයාලගේ ඉත්තෙක් වෙලා විතරයි

මට තව කිසිම දෙයක් දැනගන්න ඕනේ නෑ..... කිසිම දෙයක් ඕනේ නෑ. මා ඉතා ආවේගයෙන් ඇයට බැනවදින්නට ගත්තේ හිතේ උපන් කෝපය පිටකරමින්.

ඒ කියන්නේ මම කොහොමද මෙතනට ආවේ කියලත් ඔයාට දැනගන්න ඕනේ නෑ වගෙයි.එහෙමද??.....

මා ඇයට පිළිතුරු නොදී දෑස් වෙනතකට යොමුකරගත්තේ වචනයකින් හෝ ඇයට යටත් වීමට මා තුල වූ අකමැත්ත නිසාවෙනි.

හ්ම්ම්ම්..... මේ යානය අපේ හමුදා මූලස්ථානයට යනකන් වෙන කරන්න දේකුත් නැති එකේ මම කියන්නම්කෝ ඒ විස්තර....

ඇයගේ එම පිළිතුර මා ගැස්මකට පත්කරන්නට සමත් විය....   කිසිදු සැකයක් නැත.අවසන් කැරළිකරුවන් සියල්ල මොවුනගේ සිරකරුවන් වනු නිසැකයි.මේ සියල්ලටම හේතුව මාගේ මුරණ්ඩු කම බැව් මට සිතෙන්නට විය.සේනක පැවසූ දේ නිවැරදි යැයි මට මොහොතකට සිතිණි.... යන්තමින් හෝ සතුටට පත් විය හැකි නම් ඒ ජයසිංහ ජීවතුන් අතර සිටීම පිළිබඳව පමණි.....

මුලින්ම ඔබට බොහෝමත්ම ස්තූති කරන්න ඕනෙ අශාන් අපේ සැලැස්ම පහසු කෙරෙව්වට.... ඔබ සෙබලියව යානයට රැගෙන ආ මොහොතේ ඉඳලා ඔබ අපිට අවශ්‍ය සියළුම තොරතුරු ලබා දුන්නා.... ඇගේ ආයුධත් ඔබ සුරැකිව රැගෙන ආපු එක සෑහෙන්න ප්‍රයෝජනවත් වුනා අපිට....

මා නිරුත්තරව ඇගේ කතාව අසන්නට වූයේ මෙයින් ගැලවීමට කිසිදු අවස්ථාවක් නොමැති බව හැඟුණු නිසයි.වරදකරු මා යැයි ඇසෙන විට දරාගත නොහැකි තරම් දුකක් හදවතට දැනෙන්නට වූයේ නිරායාසයෙන්.මම නැවතත් ඇගේ කතාවට සවන් යොමුකරන්නට සිතා ගත්තෙමි.

සෑම සෙබලියකුගේම හිසට සවිකරලා තියෙන පළඳනාව ඔබට මතක ඇති සමහරවිට.එය එක්තරා ආකාරයක පණිවිඩ හුවමාරු යන්ත්‍රයක් නමුත් එයින් සම්ප්‍රේශණය කල හැක්කේ සිතුවිලි පමණයි.මේ වගේ රහසිගත මෙහෙයුමකදී එය සෑහෙන්න වැදගත් මෙහෙයක් ඉටු කරනවා.කිසිදු පුද්ගලයෙකුට එම සන්නිවේදනයට සවන් දෙන්න බැහැ.

සෙබලියට පහරදුන් පසු ඇගේ හිසේ වූ එම උපකරණය ගලවා ඉවත්කල බැව් මා මතකයට පිවිසිණි.මා එය නැවත රැගෙන ආවේද නැත.සෙබලිය සතුව තිබූ ආයුධ පමණක් යානයට රැගෙන ආ බව මා හට හොඳ මතකයක් තිබිණි....

ඒ පළඳනාව ඔබ හෝ ඔබේ කැරළි කණ්ඩායෙමේ කිසිවෙක් පැළඳුවත් පලක් වෙන්නේ නෑ.එය නිර්මාණය කරලා තියෙන්නේ අපට උපතේදිම මොළයට ඇතුලත් කරන කුඩා පරිපථයක් සමග ක්‍රියා කිරීමට.ඒ පරිපථය හමුදා මෙහෙයුම් මැදිරිය හා සම්බන්ධයි.අපගේ සෙබළියන් සතුරන් අතට පත්වූවොතින් ඔවුන් සිටින ස්ථානය තහවුරු කරගැනීමටත්,අවශ්‍ය වූ විටක අපගේ රහස් සඟවා ගැනීමට ඔවුනගේ මතකය මකා දැමීමටත් එය ඉතාමත් වැදගත්..... දැන් ඔබට තේරෙනවා ඇති අශාන් ඔබ ඇයව යානයට රැගෙන ඒමෙන් සිදුකරගත් විනාශය....

ඒත් ඔබ කොහොමද මෙතනට ආවේ.....??? ටෙලිපෝර්ට් යන්ත්‍රයකට සමාන කිසිවක් ඇගේ ආයුධ අතර තිබුනේ නෑනේ..??? මම විශ්මයෙන් විමසන්නට වූයෙමි.

ඔබට වැරදුණු තැන එතනයි අශාන්...... හමුදා සෙබලියන් විදියට ඕනෑම හදිසි අවස්ථාවකදි නැවත මූලස්ථානයට ටෙලිපෝර්ට් වන්නට හැකි අයුරින් තමයි ආයුධ නිපදවලා තියෙන්නේ.හැම සෙබලියක්ම රැගෙන යන ආයුධයේ ටෙලිපෝර්ට් වීමට උදව් දෙන උපාංගයක් තිබෙනවා.....එය ද්විත්ව දොරටු ටෙලිපෝර්ට් උපාංගයක්.ඔබ රෝහලේදි දුටු තාක්ෂණයට වඩා එය බලවත්....

සියල්ලම මා හට පැහැදිලි විය.මොවුන් අපට වඩා පියවර ගණනාවක් හැම අතින්ම ඉදිරියෙන් සිටීම නිසා අපට ජය ගැනීමට කිසිදු අවස්ථාවක් නැත යැයි මට සිතිණි.නමුත් සෙබලියක් නොපැමිණ ඒ වෙනුවට වෛද්‍යවරියගේ පැමිණීම මා තුල විශාල කුකුසක් ඇති කිරීමට සමත් නුවූවා නොවේ....

සම්පූර්ණ යානයේ පාලනය මේ වන විට සෙබලිය සියතට රැගෙන සිටියාය.සෙසු සාමාජිකයන්ට අත්වූ ඉරණම පිළිබඳ වැටහීමක් නොතිබුනද ඔවුන් තවමත් ජීවතුන් අතර සිටින බවට මා තුල දැඩි විශ්වාසයක් තිබිණි.මා පසෙකින් සිහිසුන්ව සිටියේ ජයසිංහයි...

කාන්තාවන් දෙදෙනෙකු පැමිණ කැරළිකාර කණ්ඩායමක් සහිත යානයක් පාලනය කිරීම පිළිබඳව සියුම් ලැජ්ජාවක් හිතට නොදැනුනා නොවේ..... නමුත් දැන් මෙහි බලාසිටීම හැර කරන්නට කිසිත් නැත.මොවුන්ගේ මූලස්ථානයට කෙතරම් දුර ප්‍රමාණයක් ඇත්දැයි පවා නොදැන කිසිදු පියවරක් ගන්නටත් බැරිය.දෑත් සෙලවීමට පවා නොහැකි අයුරින් වෙලා තිබීම නිසා මා හැම අතින්ම පරාජය වී හමාරය...

සේනක පිළිබඳ මතකය එක්වරම මා සිතට පිවිසියේ එවිටයි.ඔහු යානය තුලට පිවිසියේද යන්න මා හට විශ්වාස නැතිමුත් යම්හෙයකින් ඔහු යානය තුල සැඟවී සිටීනම් සෙබළියට එරෙහි වී නැවත පාලනය අප අතට ගැනීමට වැඩි වාසියක් ඇති බැව් මා හට වැටහිණි.එහෙත් ඇගේ ක්‍රියාකාරකම් අධ්‍යනය කරමින් සිටින හමුදා මූලස්ථානය තවත් සෙබලියන් යානය තුලට එවීමට පියවර ගැනීම වැලැක්වීම ප්‍රථමයෙන්ම කල යුතු ක්‍රියාවයි......

*****

සේනක දෑස් විවෘත කර වටපිට බලන්නට විය.තමා සිටිනා තැන පිළිබඳව කිසිදු මතකයක් ඔහු තුල නැති ආකාරයකි.මදක් වේලා නිසොල්මන්ව සිටි ඔහු අපහසුවෙන් නැගී සිටීමට උත්සහ කරන්නට විය.මදක් වේලා උත්සහ කිරීමෙන් පසු ඔහු නැගිට අසල වූ මේසයක් අල්ලාගෙන සමබර වීමට උත්සහ ගත්තේ බිම්ගෙය කඩාවැටීමේදි ඔහුගේ ශරීරයට සිදුවූ තුවාල නිසාවෙනි....

තමා අල්ලාගෙන සිටින මේසය මත ඇති අවිය දෙස ඔහු දෙනෙත් යොමුකලේ මෙවිටයි.අසිහියෙන් මෙන් යානයට නැගගෙන මේ කාමරයට පැමිණි පසු ඔහු සිහිසුන්වූ බව ඔහුගේ මතකයට පිවිසිණි.නමුත් තිබූ නමුත් එම මොහොතේ මේසය මත අවියක් නොතිබුණු බව ඔහුට හොඳහැටි මතකයේ තිබිණි... එම අවිය අතට ගෙන පිරික්සීමට ගත්විට ඔහුට එහි වූ ලාංඡනය දැකගන්නට ලැබුණි.නිසැකයෙන්ම එය හමුදා සෙබලියකගේය...

යානය හමුදා සෙබලියන්ගේ පාලනයට නතුවී ඇතැයි යන්න සේනකට සිතිණි.ඔහු වහා එම අවිය තම අතට ගෙන අපහසුවෙන් ඉදිරියට ගමන් කරන්නට විය.ඔහුට එක්වරම කෑ ගැසීමක් ඇසිණි.නිසැක වශයෙන්ම ඒ අශාන්ගේ කටහඬයි.ඔහු ඉදිරියට යත්ම කවුරුන් හෝ තමා ඉදිරියට පැමිණෙන හඬක්ද ඔහුට ඇසෙන්නට විය.ඔහු වහා අසල වූ කුටියට පිවිසියේය.ඔහු සිටි කුටිය පසුකරමින් ඉදිරියට ගමන් කරන්නට වූයේ හමුදා සෙබලියකි.ඔහු තම අවිය ගෙන ඈව ඉලක්කගත කලද තව කෙතරම් සෙබලියන් යානයේ සිටීද....?? මැය මියැදුණත් අනෙකුත් සෙබලියන් පැමිණ තමාට පහරදෙයිද...??? ඔහු කල්පනා කරන්නට විය.අවසානයේ ඔහු සිය අවිය පහත හෙලුවේ මෙම අවස්ථාවේ හොඳ සැලැස්මක් නොමැතිව සටනට පිවිසීම අනුවණ ක්‍රියාවක් යැයි ඔහුට සිතුනු නිසායි...

මුළු යානයේම පාලනය තිබුනේ කාන්තාවන් දෙදෙනකු අත බව ඔහු නිකමටවත් නොසිතන්නට ඇත....

ඔහු කුටියෙන් පිටතට පැමිණ සෙබලිය පැමිණි දිශාවට ගමන් කරන්නට විය.තමා ගමන් කරමින් සිටින්නේ යානයේ වෛද්‍ය කුටිය වෙතට බව එහි තිබූ සලකුණු වලින් ඔහු වටහා ගත් බවක් පෙනෙන්නට තිබුණි.ඔහු සෙමින් සෙමින් එම කුටිය අසලට පිවිසීමට සමත් විය.කාන්තා කටහඬක් යාන්තමට ඔහුට ඇසෙන්නට විය නමුත් ඇය පවසනා දේ ඔහුට හරියාකාරව නොඇසිණි....

දොර යන්තමින් විවෘත කරගත් ඔහු ඇතුලත සිදුවන දේ බලන්නට උත්සහ කලේය.ඔහුට දැකගැනීමට හැකිවූයේ පුටුවට තබා අත්පා වෙලා ඇති අශාන්ව සහ පසෙකින් බැමි රහිතව වැතිරී සිටින ඔහුගේ නායක ජයසිංහවයි.අශාන් ඉදිරිපිට වූ අසුනේ සිටින කාන්තාවද ඔහුට දැකගැනීමට හැකිවිය.ඔහු සිතූ දේ නිවැරදි යැයි ඔහුට සිතිණි.තව බොහෝ සෙබලියන් යානය තුල සිටින බැව් ඔහු ප්‍රත්‍යක්ෂ කරගත්තේය.

ඔහු දොර අසලින් මෑත්වී බිත්තියට හේත්තු වී සිටින්නට වූයේ බලාපොරොත්තු රහිතවයි.යානයේ සියළු දෙනා මේ වනවිට මොවුන්ගේ සිරකරුවන් බවට පත්ව ඇතැයි ඔහුට සිතිණි.තමන්ට තනිවම මෙම සටන කරන්නට නොහැකි බවත් ඔහුට වැටහිණි.එසේ නම් අවම වශයෙන් අශාන්ව හෝ මුදාගැනීම අත්‍යාවශ්‍යය කරුණකි.මැය තනිව සිටින නිසා පහර දීම පහසු යැයි ඔහුට සිතිණි.ඔහු නැවත දොර හිඩැස වෙතට තම දෑස් යොමුකලේය...

එවිට ඔහු දුටු දර්ශනය ඔහුව බියෙන් තැති ගැන්වීමට සමත් විය..... 

ප/ලි

පොටෝව ගත්තේ මෙතනින් http://smhttp.14409.nexcesscdn.net/806D5E/wordpress-live/images/Screen-shot-2011-06-23-at-8.56.47-AM-e1308844675527.png හැබැයි පොඩ්ඩක් විතර එඩිට් කරලා දැම්මේ.

ඊළඟ කොටස දෙන්න සෑහෙන්න කාලයක් යයි.ඒ ගැන අමනාප වෙන එකක් නැතිවෙයි කියලා හිතනවා හැමෝම.... 

Tuesday, July 10, 2012

නගර ශෝභිනියක් ලුහුබැඳ....



අද ඉඳන් පත් ඉරුවේ තව අළුත් ලේබලයක් යටතේ කතා ලියවෙන්න පටන් ගන්නවා.මේ ලේබලයේ අදහස මට දුන්නේ ඩූඩ් අයියා(henryblogwalker the Dude).පහුගිය ටිකේම මගෙ අතින් අපේ සහෝදර සහෝදරියන්ගේ බ්ලොග් වලට ටිකක් විතර ලොකු කොමෙන්ට් වැටුණා පුංචි පෝස්ට් එකක් විදියට.ඒකට හේතුව වුනේ එයාලා ලියලා තියෙන පෝස්ට් එක කියෙව්වාම මම අත්විඳපු දේවලුත් මතක් වෙච්චි එක.ඉතින් ඒ මතක් වුනාම ඒක ලියන්නම හිතුනා එයාලට කොමෙන්ට් එකක් විදියට....

ඉතින් අද ලියන්න යන කතාව මතක් වුනේ තහනම් අඩවියේ වල් රජා ලෙස විරුදාවලි ලත් අපේ අඩවි රජතුමාගේ පෝස්ටුවක් නිසා.පෝස්ටුවට රජා දාලා තිබුනේ මෙන්න මේ මාතෘකාව.පච්ච කොටන කෙල්ලෝ බඩුද?


***********************************************************************************************
·                     යටි පස්ස - වැරදියට තේරුම් ගන්න එපාලුය. මේ කියන්නේ අර යටි බඩත් සමගම ඊට ප්‍රති විරුද්ධ දිශාවේ තියන ප්‍රදේශය ගැනය. ඔය ගෑල්ලමයිගේ මේ හරිය හරි ලොකුයිලුය. එහෙයින් හෙන පත මල් වතු, කුරුළු උයන්, මකර තෝරන් වගේ ලොකු ලොකු පච්ච ඔය හරියේ නියමෙට වදිනවාලුය.



***********************************************************************
ඕං ඔය උඩින් තියෙන්නේ ඒ පෝස්ට් එකේ එක එක වර්ගීකරණයන්ට අදාලව දාලා තිබුනු පච්ච වලින් එකක් ගැන රජාගේ විස්තරේ.ඕං ඔය පච්චය දැක්කාම මට මතක් වුනේ සෑහෙන්න කාලෙකට කලින් මම මුහුණ දුන්නු සිද්ධියක්.

 පුස්සැල්ල සර්ගේ පන්තිය දෙල්කඳ හංදියට අරන් ගිය අළුතම තමයි මේ සිද්ධිය වුනේ.එදා බ්‍රහස්පතින්දා දවසක්.සාමාන්‍යයෙන් සර් පන්තිය ඉවර කරන්නේ 7ට වුනාට පෝලිමට හරිම සංවරව පන්තියෙන් එළියට එන්න ඕනේ නිසා අපි පන්තියෙන් එලියට යනකොට 7.15 විතර වෙනවා.අපි තුන්කට්ටුවක් තමා පන්තියේ එකට හිටියේ කවුරුත් දන්න මණ්ඩිපාලත් මමත් ලයියාත් තමා තුන්කට්ටුව...

ඕං කතාව රජාගේ බ්ලොගේට කොමෙන්ට් එකක දාපු විදියටම....

යටි පස්සේ පච්ච මම සියැසෙන් මුල්වරට දැක්කේ පුස්සැල්ල සර්ගේ ක්ලාස් ඉවර වී නුගේගොඩට දෙල්කඳ හන්දියේ සිට පාගමනින් පැමිණෙද්දීය...

බ්ලොග් කරුවෙකු වූ මන්ඩියාද ලයියාද මා සමග එදා රෑ හතට පමණ හෙමින් ගමනින් නුගේගොඩ කරා පියනැගීමු.ඉස්සරහින් සුදුම සුදු කකුල් දෙකක් දර්ශනය වන්නට විය.

මචං අර මෝහිණිද බලහං

මගේ මුවින් පිටවිය.මන්ඩියා දෑස් කරකවා බලා

 "නෑ බං මෝහිණි වෙන්න බෑ... ඒ මෝහිණි නම් එහා පැත්තේ ඉන්නවා ඇත්තේ මෝහිණිගේ අම්මා"

මලා හුටාය මම නැවත රබර් ඇස් කරකැවීමි.ගල් ෂෝටක් සහ කෙටි ටි ෂර්ටයක් ඇඳ සුරූපි කෙල්ලක් ලැසි ගමනින් ඇවිදිනවාය.එහා පැත්තේ මැදිවිය ඉක්මවූ ගැහැණියක් ඈ සමග තරඟෙට ඇවිදිනවාය.

මම පා ඉක්මන් කලෙමි.අධි වේගයෙන් ඈ කරා ලංවිය.ඇගේ යටි පස්සේ ලස්සන ලිය වැලක් සහිත පච්චයකි.... ඒ කාලයේ මා ඇති වෙනකන් ඉංග්‍රීසි වැඩසටහන් කීපයක් නැරඹුවෙමි.ඒවා ELLEN සහ TYRA ය.ඒ දෙන්නා ගැන කතා කර පලක් නැත.දිනක් ටයිරා කෙල්ල මෙවැනි පච්ච නම් කලේ ට්‍රෑම්ප් ස්ටෑම්ප් යන නමිනි.ස්ට්‍රිපර්ස්ලා මේවා ගහනවාලුය.ඈ එවැනි ස්ට්‍රිපර්ස්ලා කීපයක් කැඳවා යටි පස්ස පෙන්වා ඒ ගැන පැහැදිලි කිරීමක් එදින කලාය.එය මගේ දැනීම වර්ධනය කලේයලු.

ඇගේ සුදු යටි පස්ස දුටු සැනින් මට මහා හයියෙන් ට්‍රැම්ප් ස්ටෑම්ප් යනුවෙන් කියවිණි.මල මගුලයි ජූලි හතයිය.ඇය අකුණක් වැදුනාක් මෙන් පිටුපස හැරුණාය.මාගේ දෙකකුල් පණ නැතිවෙන සෙයක් දැනුනි ඈ එතරම් සුරූපි ළලනාවක්ය.අඩ අඳුරේ පවා බුරිය විසිබල්ය.

ඈ සිනාසුනාය.මා සිනාසුනේය.ඈ ගමන අඩාල කොට අප හා සමාන්තරව ඇවිදීමට උත්සහ ගත්තාය.මන්ඩියා නෝ ටෝකිංය ලයියාගේ කට කනේය.උගේ පපුව හිරවෙලා වෙන්නැතිය.ඈ අප සමග දෙඩීමට උත්සහ කලාය.මගේ සරුවාංගෙම වේවලනවා දැනිනි. ඇය හීන් හඬින් හායි කිව්වාය.ඒ හායි පාරට සියල්ල සිදුවෙනවාය.අපි කුඩා ළමයින් වීමු.ඒවා ඒ කාලේ ඔරොත්තු නොදෙන්නේය.මන්ද නැරඹූ සියළු වැල් කතා දෑස් ඉදිරිපිට සිදුවීමට සූදානම් සෙයක් දැනුනි... 

මා හායි කිව්වාට කට හෙල්ලුනා පමණි.ඇයි කිංකිණි හඬින් සිනා සැලුවාය.ඈ පොඩි එකියක මෙන් උඩ පැන කට වසා ගත්තාය.තව මොහොතකින් මාගේ මොලේට ලේ සැපයුම අඩාල වන්නට යන බව දැනුනි....


සෑහෙන වෙලාවක් අප එසේ ඇය පිටුපසින් යන්නට ඇත.ඇයද පිටුපස බලමින් හිනාවෙමින් ඇගේ ගමනේ යෙදුණාය.ටික වේලාවකට පසු කොහේදෝ සිටි හාල් පාරුවෙක් පැමිණ කාරයක් අප දෙදෙනා හරහා දැම්මේ උගේ හොම්බ තලන්නට තරම් තරහක් මා සිතට ඇතුලත් කරවමින්ය.අප මදක් නැවතුනෙමු.එක්වරම ඇය ගොස් නැවුනාය ඈ යම්දෙයක් සාකච්ඡා කරනු ඇසිනි.කනට වඩා ඇස මෙහෙයුමේ බැවින් ඒවා ඇසුනේ නැත.කාරය පිම්මේ පිටත් විය ඈ නැවත අප හා සිනාසි ලැසි ගමන ඇරඹුවාය.එතෙක් වේලා ඈ සමග අපද නැවති සිටි බව සිහිවූයේ එවිටයි.එමෙන්ම ඈ ගැන සිහින් හෝ වැටහීමක් ලැබුනේද එවිටයි.ඒ සමගම තව මූකලං බස්සෙක් පැමිණ ඈ ළඟ වාහනේ නැවතුවේ පෙර පරිදිමය.මාගේ සපත්තුවේ ලේස් ලෙහී තිබෙනු මා දුටුවේද එවිටයි(ගැටගහලා තිබ්බ එක ලෙහලා ආයේ ගැටගැහුවා)

මා මගේ පාඩුවේ ලේස් හිමින් සැරේ ගැටගැහුවේ ඈ ඉස්සර නොකරන්නටය.අවාසනාවක මහත ඈ එම කාරයට නැගුණාය.ලේසය අතහැර මා එක්වනම නැගී සිටියේ අවසන් වතාවට හෝ ඈ දැකගැනීමටයි....කාරයට නැගි ඈ කාරය පිටත් වෙත්ම නැවත මා දෙස බලා සිත් කලම්බන සිනාවක් හෙලුවාය.... හීන් දුකක් නොදැනුනා නොවේ... ඈ සමග ආ ගැහැණියද වාහනයට නැගීම මා හට තවම ප්‍රෙහේලිකාවකි....

මා නැවත එළැඹ සිහියට පෙළඹුනේ මන්ඩිපාලගෙන් මගේ පිට මැද්දට වැදුණු ප්‍රහාරයකිනි.... දිගු සුසුමක් හෙලූ මා ඔහු දෙස බැලුවේ ඔහුගේ කොමෙන්ට්ස් දැන ගැනීමටයි... ඔහු තාමත් කතා නැතිය.ලයියා කට කනේ තියාගෙන ඉන අතේ තියාගෙන ගල්වී සිටින්නේය....

මම ඔහුට යමක් පැවසීමි "පව් නේද බං අහිංසකී...."

ඔහු ගත් කටටම මෙසේ පැවසීය "රුපියල් 100ක් තිබ්බා අතේ,අපරාදේ බං ඒක දීලා *** බලාගන්න බැරිවුනානේ"



ප/ලි - ඒ අපගේ ලයියාය... දන්නෝ දනිතිය.ඒකා මෙය දුටු දාට මාත් ඉවරයිය.

මේ පච්ච කෙලිය මම දකින්නේ නොදන්නා එවුං ආසාවට ගැහුවට ඒකෙන් ගම්‍ය වෙන විවිධ තේරුම් දන්නෙ නෑ.සමහර විට නොදැන බඩු පච්චයක් ගැහුවොත් බඩුම තමා.දැන දැන ගහන එවුන් ඉතින් දන්නවනේ අපි දැකපු කෙනත් එහෙම කෙනෙක්.එයාව ත්‍රිවිල් එකකින් දෙල්කඳ හංදියෙන් බස්සනවා එයා එතන ඉඳන් නුගේගොඩ හංදියට එද්දි අනිවා වාහනේකට නගිනවා...

අපිට ඊට පස්සේ දවස් දෙක තුනක්ම එයාලව හම්බුනත් අපි හිනාවුණා විතරයි.පසු කාලීනව ලයියාගේ ප්‍රිය වෙන්ඩ බාරිත් පන්ති ආපු නිසා දෙල්කඳ හංදියේ ඉඳන් නුගේගොඩට බස් එකෙන් යන්න වුනා.


මුල් පින්තූරේ ගත්තේ මෙතනින් http://yunghova.com/wp-content/uploads/2011/09/prostitutes.jpg

Thursday, July 5, 2012

ගැහැණු ලොවක සිරකරු... 5 කොටස

මුල් කොටස් සඳහා
1 කොටස
2 කොටස
3 කොටස

4 කොටස
**********************************************************************************



කැරළිකාර කණ්ඩායමේ නායකයා සහ ඔහුගේ සගයෙකු වූ සේනක බිම්ගෙය ඔස්සේ ඉදිරියට දුවන්නට විය.ඔවුන්ගේ අත වූයේ ආයුධ කිහිපයකි.ස්වයං ජනනය වන විදුලිය සැපයුමක් මගින් ඒ ආයුධ පණ ගැන්වී තිබිණි.තව දුරටත් අවි ආයුධ සඳහා වෙඩි උණ්ඩ භාවිතා නොවිණි ඒ වෙනුවට භාවිතා වූයේ ලේසර් ධාරාවන් විදින ආයුධයි.....

මේ අතර කැරලිකරුවන්ගේ දෙවැනි ප්‍රධාන දොරටුවද බිඳගත් කාන්තා සෙබලියෝ විශාල ප්‍රමාණයක් බිම්ගෙය තුලට පිවිසුණි.ඔවුන් අතද නවීන පන්නයේ අවි ආයුධ රැසක් විය.සෙබළියන්ගේ අණ දෙන නිලධාරිනියගේ සංඥාවකට අනුව සෙබලියන් සිව් දෙනෙක් බිම්ගෙය ඉදිරියට ඇදුනේ අනෙකුත් සෙබලියන් ඉදිරි දොරටුව ආසන්නයේ නැවතී සිටියදීයි.... සුළු මොහොතකින් බිම්ගෙය තුල විදුලි ආලෝකය ඇණ හිටියේය.ඒ සමගම ප්‍රධාන නිලධාරිනිය හිසට පැළඳ සිටි පටියක් හැඩැති උපකරණය අතකින් තද කලාය..... ඇය බලාපොරොත්තුව සිටි ඇමතුම ඇයට ලැබිණි.විසිර ගිය සෙබලියෝ බිම්ගෙයි විදුලි සැපයුම බිඳ හෙලා ඇත.

එක්වරම විදුලිය විසන්ධි වීමෙන් පසු සේනකත් කැරළිකාර කණ්ඩායමේ නායකයාත් ඉතාමත් අපහසුතාවකට පත්විණි.ඔවුන්ගේ අත තිබූ අවියේ වූ පන්දමේ ආධාරයෙන් ඔවුන් ඉදිරියට ඇදුණි...

උන් දෙවෙනි දොරත් කඩාගෙන ඇවිත් විදුලිය නවත්තලා....අපි  සැලැස්ම වෙනස් කරමු සේනක ඔයා දෙවෙනි ජෙනරේටර් කාමරේට යන්න.මම ආයුධ ගබඩාවට ගිහින් බෝම්බ ටික අරගෙන උන් එන්න කලින් අටවන්නම්.අපි දෙන්නගෙම ඔරලෝසු වෙලාවට හදාගමු.හරියටම තව විනාඩි විස්සකින් ඔයා කරන්ට් එක එවන්න.හැබැයි මතක තියාගන්න කරන්ට් එක එවන්න ඕනේ ප්‍රධාන බල්බ වලට නොයා ස්විච් වලට විතරක් එන විදියට....

කැරලි කණ්ඩායම් නායක ජයසිංහ නොනැවතී ඉදිරියට ඇදෙන්නට විය.ඔහු තම ඔරලෝසුව වෙත නෙත් යොමුකල විට විනාඩි 10ක් ඔහු ඉදිරියට ගමන් කර ඇති බව වැටහිණි.ආයුධ ගබඩාවෙන් ගෙනා ලේසර් ධාරා නිකුත් කරන උපකරණ ඔහු බිත්තිය දෙපස සවිකරමින් ආපස්සට ගමන් කරන්නට විය.එම උපාංග ක්‍රියාත්මක වන්නේ සංවේදක උපකරණ මගිනි.එක් යුගලයක් සවිකර ඇති පෙදෙසක් පසුකරන විට එම උපාංගය ක්‍රියාත්මක වන අතර ඊළඟ උපාංග යුගලයේ සීමාව කෙනෙක් පසුකරන විටම එම සීමා දෙක අතර සිටින සියළුම දෙනා අධික ලේසර් ධාරාවන්ට හසුවී විනාශ වන අයුරින් එය සකසා ඇත.එවැනි යුගල 8ක් විවිධ ස්ථානයන්හි ඔහු සවිකර තිබුණි.අවසාන යුගල් දෙක සවි කර තිබුණේ  ඇතුළු වන විටම ක්‍රියාත්මක වන ආකාරයටයි.

සෙබලියන් ළඟ ළඟම එන බව ඔහුට දැනුණි.ඔහු වඩාත් වේගයෙන් බෝම්බ අටවන්නට විය.ඔහු සතුව තිබූ සියළුම බෝම්බ අටවා අවසානයේ ඔහු තම අතවූ උපාංගය පරික්ෂා කලේ විමසිල්ලෙනි.ඔහු අත වූයේ බෝම්බ ක්‍රියාත්මකදැයි පෙන්වන කුඩා තිරයක් සහිත උපකරණයකි.ඔහුගේ පුදුමයකට මෙන් එය ක්‍රියාත්මක නොවන බව සඳහන් විණි.ඔහු වහා අසල බිත්තිය හාරන්නට විය.සුළු මොහොතකින් අදාල විදුලිය ගෙන යන රැහැන් ඔහුට දක්නට ලැබිණි.එහි විදුලිය ගමන් නොකරන බැව් දුටු ඔහු වහා ජෙනරේටර් කාමරය වෙත දුවන්නට විය....

සෙබලියන් ඉතා වේගයෙන් බිම්ගෙය තුලින් ඉදිරියට ඇදෙමින් දෙපස කුටි වල තිබූ සියළුම යානාවන් සහ උපාංග විනාශ කරමින් සිටියහ.කිසිදු ප්‍රතිරෝධයක් නොමැති නිසා අණ දෙන නිලධාරිනිය තම සෙබළියන් සියල්ලටම නවතින ලෙසට සන් කලාය.ඉන් පසු ඈ තම බෑගයක වූ ඉතා කුඩා උපකරණයක් ගෙන බිමින් තබා එය ක්‍රියාත්මක කලාය.එය කුඩා රොබෝ යන්ත්‍රයකි.එය ඉදිරියෙන් ඇති විකිරණ හා බෝම්බ ආදිය පරික්ෂාව සඳහා යොදවනු ලබන්නකි.බිම්ගෙයි දණ තබාගත් ඈ සිය පරිගණක තිරය දෙස ඉතා අවධානයෙන් නෙත් යොමා සිටියේ අනතුරක සේයාවක් බලාපොරොත්තුවෙනි.එම කුඩා රොබෝව බෝම්බ සවිකල ස්ථානද පසුකරමින් ඉදිරියට ඇදිනි. එම රොබෝව කිසිදු අනතුරු හැඟවීමක් නිකුත් නොකරමින් ගමන් කරන්නට විය....

මේ අතර කැරලි නායක ජයසිංහ ජෙනරේටර් කාමරය වෙත පිවිස හතිලන්නට විය.ඔහුගේ පුදුමයකට මෙන් ජෙනරේටරය ක්‍රියාත්මක කරවූ බවක් දක්නට නොවිණි.අධික කෝපයට පත් ඔහු අසල වූ පුටුවකට පා පහරක් එල්ල කරමින් හිස දෑතින්ම බදාගනිමින් බිත්තියට හේත්තු විය.ජෙනරේටරය වෙත විදුලිය සපයන ස්වයං ජනන විදුලි උපකරණයද අතුරුදහන් වී තිබුණි.ඔහු නැවත සිය අවිය රැගෙන හමුදාවන්ට මුහුණ දීම සඳහා යාමට හැරුණි.ඒ සමගම ඔහු දුටුවේ ඔහු සිටි කුටිය පසුකරමින් ඉදිරියට ඇදුණු රොබෝ උපකරණයයි.ඒ දුටු ඔහුගේ මුවග සිනහවක් ඇඳුණි....

එම රොබෝ යන්ත්‍රය විකිරණ සංවේදි රොබෝවකි.ලේසර් බෝම්බ වැනි උගුල් හඳුනාගැනීමෙහි ලා එය ඉතා විශිෂ්ට කාර්යභාරයක් ඉටුකරන නමුත් එම බෝම්බ ක්‍රියා විරහිතව පවතින විටදී එම රොබෝ යානයට එකී බෝම්බ හඳුනාගත නොහැක.රොබෝ යන්ත්‍රය එම බෝම්බ සහිත පෙදෙස පසු කරනා විට විදුලි බලය බෝම්බ වලට ලැබී නොතිබූ බැවින් බෝම්බ ඇති බව එයට හසු නොවිණි.... කැරලි නායක ජයසිංහ වහා සිය අවිය පොලොවේ ගසන්නට විය.දෙවරක් තුන්වරක් එය පොලොවේ ගැසූ පසු එම අවිය ක්‍රියාත්මක කිරීමට අවශ්‍යව තිබු කුඩා ස්වයං ජනන විද්‍යුත් උපාංගය ගලවා ගැනීමට ඔහු සමත් විය.වහා එහි වූ අග්‍ර ජෙනරේටරයට සවි කර එය ලුහුවත් කරවීය(short circuiting).නමුත් ජෙනරේටරය ක්‍රියාත්මක නොවිණි.බලාපොරොත්තු සුන්වූ මුහුණකින් යුතුව ඒ දෙස බලා සිටි ඔහු නැවත ජෙනරේටරයේ ස්විචය ගලවා එයද ලුහුවත් කරන අතර ස්වයං ජනන විද්‍යුත් උපාංගයද ලුහුවත් කරවීය.ඒ සමගම ජෙනරේටරය ක්‍රියාත්මක විණි....

ඔහු වහා ඔහු අතවූ කුඩා පරිගණක තිරය වෙත නෙත් යොමුකල විට සියළුම බෝම්බ ක්‍රියාත්මක බව දුටුවෙන් වහා බිම්ගෙයින් පිටව සිය සගයන් හමුවිම සඳහා දිවයන්නට විය.ඒ සමගම බිම්ගෙය තුලින් පිපිරුම් හඬ ඇසෙන්නට විණි.දුවන අතරේම සිය පරිගණක තිරය දෙස බැලූ ජයසිංහගේ මුවගට සිනහවක් නැගිණි.නමුත් ඒ බොහෝ වේලාවකට නොවන වග ඔහු දැන නොසිටියේය....

***

මා ඉතා කඩිනමින් යානයේ එකලස් කිරීම් සිදු කිරීමේ යෙදී සිටින්නට වූයේ තව වැඩි වෙලාවක් ඉතිරිව නැති බව දැනෙන්නට වූ නිසාවෙනි.යානයේ එකලස් කිරීම් අවසන් අදියරේ පැවතුණි.ළඟ ළඟම ඇසෙන්නට වූ පිපුරුම් හඬ මාගේ දෑත් තවත් ඉක්මන් කරවීය.සියළු දෙනාටම යානයට ඇතුළු වන ලෙස මා අණ දුන්නේ එකලස් කිරීම් අවසාන වූ වහාම ගුවන් ගතවන අභිප්‍රායෙන්.

එක්වරම ඇසුණු පිපුරුමක් සමගම බිම්ගෙයි විවරයේ වහලය කඩාගෙන වැටුනේ අප සිටි ගුහාවම දූවිල්ලෙන් වසාගනිමින්..... මොහොතක් ගතවන තුරු කිසිවක් සිතා ගත නොහැකිව මා බලා සිටියේ ගුවන් ගතවීමට පමා වී දෝයි සිතන අතරතුරයි.ඒ සමගම යම් කෙඳිරියක් ඇසෙන්නට විය....

අශාන්.......... ඒ සේනකගේ කටහඬයි.ඒ හඬ ඇසෙනවාත් සමගම මා යානය අතහැර බිම්ගෙයි විවරය තිබූ දෙසට දිවගියෙමි.සේනක ගුහා විවරය අසල බිම වැතිරී සිටිණු මා හට දක්නට ලැබිණි.ඔහුගේ ඇඳුම් ලෙයින් වැකී තිබිණි.මම වහා ඔහුව වත්තන් කර යානය අසලින් ඉන්දවා නැවත බිම්ගෙයි විවරය වූ දෙසට දිව ගියේ කැරලි නායක ජයසිංහ සොයන බලාපොරොත්තුවෙන්.මා ගුහා විවරය අසලට යත්ම සේනක කෙඳිරිලි හඬින් යමක් පවසණු ඇසිණි.යානයට නැගි සියළු සාමාජිකයන්ද මේ වන විට සේනකව වට කරගෙන සිටිණු දක්නට ලැබුණි.


අශාන්…..,ජයසිංහ සර් මට කිව්වා එයා තනියම ඉස්සරහට යන්නම් මට ඇවිත් ඔයාලත් එක්ක එකතු වෙන්න කියලා.එයා එනකන් ඉන්න එපා කිව්වා.මම ඒකට විරුද්ධ වුනත් මට එන්න වුනා.මම දැක්කා සර්ට ලේසර් කිරනක් වැදිලා බිම ඇදගෙන වැටෙනවා... තව දුරටත් මෙතන ඉඳලා තේරුමක් නෑ අපි යමු ඉක්මනට


සේනක.... හැමදාමත් මෙහෙම දුවන්න බෑනේ.අපි ගිහින් පහරදෙමු.මට විශ්වාසයි ජයසිංහ සර් ජීවතුන් අතර ඇති කියලා.එයා හිරකාරයෙක් වුනොත් සෑහෙන්න දුක් විඳියි අපිට වගකීමක් තියෙනවා එයාව බේරන්න………………

මම කියපුදේට කැමති අය ඉන්නවනම් මාත් එක්ක එන්න...


කැරළි කණ්ඩායමේ සියළුම දෙනා මා හා එක්වීමට ඉදිරියට පැමිණුනි.ඒ සමගම සේනක මාරාවේශ වූවෙක් සේ මගේ ඇඟට කඩා පැන්නේ මා විමතියට පත් කරවමින්.මීට සුළු මොහොතකට ප්‍රථම ඇවිදීමට පවා නොහැකිව සිටි මොහුට කෙසේ මෙවන් ශක්තියක් පැමිණියේදැයි මට අදහාගත නොහැකි විය.


තමුසෙට පිස්සු හැදිලද අශාන්..... ජයසිංහ සර් තනියම ඉස්සරහට ගියෙ අපි හැමෝවම බේරගන්න.සර් කරපු ඒ කැපකිරීම බල්ලට දාන්නද හදන්නේ.අපි සෑහෙන්න කාලයක් තිස්සේ මුන් එක්ක හැප්පෙනවා.අද ඊයේ ආපු තමුසෙට මෙතන තීරණ ගන්න දෙන්න බෑ.අපි වහාම යන්න ඕනේ....


මම මෙතන තීරණ ගත්තෙ නෑ සේනක..... මම කලේ යෝජනාවක් විතරයි.මේ හැමෝම ඒක අනුමත කලා.ජයසිංහගේ සැලසුම් නැතුව අපිට මේ සටන කරගෙන යන්න අමාරුයි.... මෙතනින් පැනලා යනවා කියන්නේ ලොකු වැරැද්දක්.අනික ජයසිංහ සර් ගියේ පැයකින් ආයෙ එනවා කියලා.... ඒ නිසා අපි ආයෙ යනවා ජයසිංහව බේරන්න.... එච්චරයි


මගේ සමබරතාව ගිලිහි මා බිම ඇද වැටුණේ සේනකගෙන් එල්ලවූ තදබල මුෂ්ටි පහරක් නිසාවෙන්.ඔහු මාගේ සිරුර මතට නැග තවත් පහරක් මා මුව හරහා එල්ල කලේ මාගේ දෑස් නිලංකාර කරවමින්.මා දෑතින් මූණ වසාගෙන ස්වල්ප වෙලාවක් වැතිරී සිටියමුත් සේනකගෙන් නැවත ප්‍රහාර එල්ල නොවුනි.දෑස් සෙමින් විවර කරද්දි මා දුටුවේ කැරළි කණ්ඩායමේ පිරිස් ඔහුව ඇදගෙන යන ආකාරයයි.


මා දූවිලි පිසදමමින් සිටගෙන බිම්ගෙයි වැසුණු විවරය දෙස මොහොතක් නෙත් යොමුකලේ ශෝකයෙන්.සිතට එක්වරම පැමිණි අදහසක් නිසා මා සෙමින් ඒ දෙසට ඇවිද යන්නට වීමි.මා බිම්ගෙයට ලඟාවත්ම මාගේ උරහිසිට යමෙක් අත තබනු දැණුනි.මා ගමන නවත්වා බිම්ගෙයි දොර දෙස බලා සිටින්නට විය.පිටුපසින් පැමිණි පුද්ගලයා මා ඉදිරිපිටින් පැමිණ ඔහුගේ දෑත් මගේ දෙවුර මත තබමින් මා අමතන්නට විය.


අශාන්..... මම දන්නවා ඔයාට දැනෙන දුක.අපි හැමෝටම එහෙමයි.ඒත් එහෙම කියලා මේ තරම් කාලයක් කරගෙන ආපු දේවල් නවත්තන්න බෑනේ.දැන් අපේ සර් ජීවත්ව හිටියත් එයාගේ මතකය මෙලහකට මකලා දාලා ඇති.ඒ නිසා අපි යමු ඔයා තමා මේ හැමෝගෙම අන්තිම බලපොරොත්තුව....


මා මොහොතක් ඔහුගේ දෑස් දෙක එක එල්ලේ බලා සිටින්නට වීමි...... ඔහු පවසන දෙයත් ඇත්තකි.පැය බාගයක් තුල නැවත පැමිණෙමියි කීවත් ඔහු නොපැමිණි නිසා තව දුරටත් ඔහු එනතුරු කල්මැරීමෙන් කැරළි කණ්ඩායමේ සෙසු සාමාජිකයින් පවා අනතුරේ වැටෙනු නියතය.


හ්ම්ම් අපි යමු.... මම අවසන් වරට බිම්ගෙයි වැසුණු විවරය දෙසට නෙත් යොමමින් පැවසීමි.


සුළු මොහොතකින් පසුව යානයේ එකලස් කිරීමේ කටයුතු අවසාන කිරීමට මම සමත්වුණෙමි.සියල්ලත් සමග යානයට ඇතුළු වූ පසුව මා යානයේ පාලන මැදිරියට පිවිසුණේ යානය ක්‍රියාත්මක කර වහාම මෙතනින් පලා යාමටයි.මීළඟ සැඟවුම් ප්‍රදේශය සඳහා අවශ්‍ය තොරතුරු කැරළි කණ්ඩායමේ රහස්‍ය තොරතුරු ගොනුවෙන් සොයා ගත් මම ගමනාන්තය යානයේ පරිගණක පද්ධතියට ඇතුළු කලෙමි.


යානය ගුවන් ගත කරත්ම සිතට පැමිණි සිතුවිල්ලක් නිසා අංශක 360ට හැරවිය හැකි පාලන මැදිරිය බිම්ගෙයි විවරය දෙසට හැරවීමි.බිම්ගෙයි දොරටුව ඉලක්ක ගත කල මම යානයේ වූ අධිබලැති ලේසර් ධාරා අවිය එල්ල කල විට බිම්ගෙය අවහිර කරමින් තිබූ ගල් බිඳී විසිරී ගියේ හඬක් නංවමින්.යානය නැවත පොළවට පහත් කල මා බිම්ගෙය දෙසට දිවගියේ ඉමහත් බලාපොරොත්තුවෙන්.....


***

බිම්ගෙයි දොරටුව වැසී තිබූ ගල් ඉවත් කිරීම අතහැර දැමූ ජයසිංහ ආයුධ ගබඩාව වෙත ගමන් කරන්නට වූයේ හමුදා සෙබලියන්ට යටත් වී මියැදීමට වඩා සටන් කර මිය යාම ගෞරවාන්විත යැයි සිතුණු නිසාවෙනි.තම අතවූ කුඩා පරිගණක තිරයේ වූ ආලෝකයෙන් සෙමින් සෙමින් ඔහු ඉදිරියට ඇදුණේ ඔහුගේ ශරීරයේ වූ ජවය ඒ වන විට සිඳී තිබුණු බැවිනි.


ස්වල්ප වේලාවකින් ඔහු ආයුධ ගබඩාවට ලඟා විය.අඳුරේම අතපත ගාමින් ඔහුගේ ප්‍රියතම අවිය වූ ලේසර් විදිනයක් අතට ගන්නවාත් සමගම ඔහුගේ හිසට යම් දෙයක් තදවනු දැනුණි.ඒ සමගම ඔහුට කටහඬක් ඇසිණි.


කලබල නොකර අත් උස්සන්න.....  ඔහුට කාන්තා ඇසුණේ කාන්තා කටහඬකි.

ජයසිංහ දෑත ඔසවමින් හිමිහිට අනෙක් පස හැරුණි.ඒ හැරෙනවාත් සමගම ඔහුගේ ඔළුවට ඈ අත වූ අවියෙන් ඉතා තදබල පහරක් එල්ල විණි.ඔහු කපා හෙළු කඳක් මෙන් බිම ඇදගෙන වැටිණි.සෙබලිය වහා ඔහුගේ පපුව මතට තම දණහිස තබා තම බෑගයේ වූ රවුම් හැඩැති උපකරණයක් ඔහුගේ නළලට ඇලෙව්වාය එම රවුම් උපකරණයට රැහැන් රහිතව සම්බන්ධ කරගත් තිරයක් මගින් ඈ ඔහුගේ මොළයේ ගබඩා වී ඇති මතකයන් රැස්කරගන්නට වූවාය....


ස්වල්ප වේලාවකින් ඇය සිය කාර්යය අවසන් කලාය.සියළුම උපකරණ ඇගේ බෑගයට දමාගත් ඈ නැගී සිටගත්තාය.ඇය සිය අවිය ඔහුගේ පපුවට ඉලක්ක කරනවාත් සමගම ඇගේ අතට කොහෙන්දෝ පැමිණි පහරක් එල්ල විය.ඈ එම ප්‍රහාරය නිකුත් වූ දෙසට හැරෙනවාත් සමගම ඇයගේ මුහුණ හරහා එල්ල වූ ප්‍රහාරයකින් ඈ බිම ඇදවැටිණි.....

***

මා තත්පර ගණනක් ප්‍රමාද බැව් මට වැටහුණේ බිම වැතිර සිටින ජයසිංහ දුටු විටයි.මා අත වූ අවිය බිම අතහැරුණේ මටද නොදැනුවත්වයි.මා ඉතා විශාල දුකකින් ඔහු අසල වැතිරගත්තේ තව මොහොතක් ඉක්මන් වන්නට තිබුණා නේදෝ යැයි සිතන අතරතුරයි.ඒ අසලම සිහිසුන්ව වැටී සිටින සෙබලිය දුටු මා වහා ඇයගේ හිස පැළඳි උපකරණ ගලවා දැම්මේ  දැඩි කෝපයකින්.එක්වරම සිතට නැගුණු සිතුවිල්ලක් නිසා ඇගේ දෑත් බැඳ ඈවද මා සමග රැගෙන යාමට මා තීරණයක් ගත්තේ යම්කිසි උදව්වක් ඇගෙන් ගන්නා බලාපොරොත්තුවෙන්.


ඔවුන් දෙදෙනාවද රැගෙන මම ගුහාවෙන් එලියට පැමිණෙන විට කැරළි කණ්ඩායම් සාමාජිකයන් මා වෙත පැමිණ ජයසිංහව ඔසවා යානය තුලට රැගෙන ගියේ ප්‍රථමාධාර ලබාදිමටයි.සෙබලියවද තවත් දෙදෙනෙකුට භාරදුන් මා සේනකව සෙවූ නමුත් ඔහු අතුරුදහන්ව සිටීම මා හට විශාල සැකයක් ඇති කරවීමට සමත්විය... අවසානයේ සේනක රහිතව ගමන් ඇරඹීමට මා තීරණය ගෙන අපගේ ගමනාන්තය දක්වා යානය මෙහෙයවීමට ගත්තෙමි.

පැයක් පමණ කාලයක් මා නින්දේ සිටින්නට ඇත.වාසනාවකට මෙන් යානය ස්වයංක්‍රීය පාලනයෙන් ගමන් කරමින් තිබිණි.නියමු පාලනයෙන් යානය ගිලිහී විනාඩි පහක් ඇතුලත ස්වයංක්‍රීය පාලනයට නතුවීම එම යානයේ ගුණාංගයක් බව මතකයට ආවේ පසුවයි.එය එසේම තිබෙන්නට හැර මා යානයේ ප්‍රථමාධාර කුටිය වෙත ගමන් කලේ ජයසිංහ පිළිබඳ තොරතුරු දැනගැනීමටයි.ඒ වනවිටත් ඔහු සිහිසුන්ව සිටි නමුත් සෙබලියට සිහිය පැමිණ තිබිණි.දෑත් දෙපා බැඳ ඈ පුටුවකට ගැට ගසා තිබුණි.මා ඇය වෙත යත්ම ඇය මා දෙස බලා සිටියේ දැඩි කෝපයකින් බව මා හට වැටහිණි.ම පුටුවක් රැගෙන ඈ ඉදිරිපිට හිඳගත්තේ ඇගෙන් ප්‍රශ්න කරන බලාපොරොත්තුවෙන්.....


මම අශාන්....  මම ඈ අමතීමි.නමුත් ඇය හිස පහත් කරගෙන සිටියා මිස කිසිදු ප්‍රතිචාරයක් නොදුන්නාය.බොහෝ වේලාවක් මම ඈ ඉදිරිපිට වාඩිවී සිටියේ ඇය කතාකරන තුරුයි.නමුත් ප්‍රතිචාරයක් නොමැති තැන මා නැවත ඇය අමතන්නට උත්සහ කලෙමි.


උඹ කවුරු වුනත් මට උඹත් එක්ක කතාවක් නෑ.......


උඹත් එක්ක කතාකරන්න ඕනේ නෑ මට දැනගන්න ඕනේ තමුසේ අපේ සර්ට තමුන් මොනවද කලේ කියන එක....


ඒක කොහෙත්ම වෙන්නේ නෑ... ඇය එම වචන පෙල කියා නිමකරනවාත් සමගම මා ඇගේ කෙස් වැටියෙන් අල්ලා ඇගේ හිස එසෙව්වේ හිතේ උපන් ආවේගයකිනි.


උඹ කතා නොකලොත් කවදාවත් ආයේ උඹට ඉර එළිය දකින්න හම්බුවෙන්නේ නෑ.අන්න ඒක මතක තියාගනින්....


මම කතා කලත් ඒ දේමයි වෙන්නේ කියලා මම දන්නවා.... අතපය ගැටගහලා ඉන්න ගෑනියෙකුට අත උස්සන්න හොඳ පිරිමකමක් තියෙනවා කියලා පේනවා....


උඹට මම......... ඈගේ කෙස්වැටිය අතහැර පහරක් එල්ල කිරීමට සූදානම් වත්ම හුරුපුරුදු කටහඬක් මා අමතනවා ඇසිණි.

~~මතුසම්බන්ධයි~~

ප/ලි

මේ කතාව දිගටම ලියලා මට ඒකාකාරි ගතියක් දැනෙනවා.කියවන ඔයාලට කොහොම හිතෙනවද දන්නේ නෑ....අදත් වෙනදා වගේම ගල් මුල් යෝජනා චෝදනා දක්වයි කියලා මම බලාපොරොත්තුවෙනවා.හිතට දැනෙන ඕනෙම දෙයක් කියලා යන්න.ඔයාලා මොනා කිව්වත් ඒ කියන දෙයින් මම දෙයක් ඉගෙනගන්න බලාපොරොත්තු වෙනවා.... 
පින්තූරය ගත්තේ මෙතැනින් http://mp1st.com/wp-content/uploads/2011/10/ghost-recont-future-soldier-art-530w.jpg