ගැහැණු ලොවක සිරකරු...

දිගු නින්දකින් දැනෙන වෙහෙසක් සමග මා සෙමින් දෑස් විවර කර මාගේ නිවසේ වහලය දෙසට මොහොතක් නෙත් යොමන්නට වීමි.නමුත් වෙනදා දකින විදුලි පංකාව වෙනුවට ඉහළින් එල්ලා දිස්වූයේ දිගු ආලෝක දහරාවකි.වහා නැගී සිටීමට උත්සහ ගත් නමුත් මාගේ ශරීරය පුරා තිබූ විවිධ වයර් නිසා ඒය අපහසු කරුණක් විණි.බොහෝ උත්සහයකින් පසුව දෑත් නිදහස් කරගන්නවාත් සමගම යම්කිසි අනතුරු හැඟවීමේ නාදයක් නාදවෙනු ඇසෙන්නට විය.වහා මාගේ ඇඟපුරා සවිකර තිබූ වයර් ගලවාගෙන මා හුන් සයනයෙන් බැසීමට උත්සහ කලත් යම්කිසි බාධකයක් හේතුවෙන් මා හට පසුබසින්නට සිදුවිය.මා උන්නේ සාමාන්‍ය ඇඳක නොව වීදුරු වලින් වටකරන ලද කුටියක බැව් වැටහුනේ ඉන් පසුවයි.මා හැකි වෙර යොදා එයට පහර දුන්නද පලක් නොවුණි ඒ සමගම යම්කිසි වායු කාන්දුවක් වැනි ශබ්දයක් ඇසෙන්නට වූ අතර මාගේ දෑස් කෙමෙන් බරවෙනු මට දැණුනි...

“දැන් කොච්චර වෙලාද”

“පැය 4කට විතර කලින් ඇහැරුණේ ඩොක්ටර්.සෑහෙන්න කලබලයක් කලා ඒ නිසායි නිර්වින්දනය කරන්න වුනේ”

මා වටා සිටි පිරිසක් යම් සාකච්ඡාවක් කරනා අයුරු සිහිනයකින් මෙන් ඇසෙන්නට විය.ඔළුව බමන ගතියකින් යුක්ත වූ බැවින් හිස එසවීමට ගත් උත්සහයද නිරර්ථක විය.ඉතාමත් අපහසුවෙන් දෑස් විවර කරගත් මට දක්නට ලැබුනේ මා වටා සිටිනා කාන්තාවන් සමූහයක්.සියල්ලන්ම පාහේ වෛද්‍යවරියන් හෝ වෛද්‍ය ශිෂ්‍යාවන් විය හැකියැයි මට සිතුනේ ඔවුන් සැරසී සිටියේ එකම ඇඳුමකින් වීම නිසයි.සුළු මොහොතකින් මා සිටි වීදුරු කුටිය විවෘත විණි.

“සුභ උදෑසනක් SLAN මහත්මයා.මම මේ රෝහලේ ප්‍රධාන වෛද්‍යවරිය”

“මගෙ නම SLAN නෙමෙයි....”

“ඔබට පහුගිය සිද්ධීන් මතකද??”

“මම කොහොමද මේ රෝහලට ආවේ.... මම ඉන්න ඕනේ ගෙදර.මගෙ නම SLAN නෙමෙයි මම ASHAN NALAKA.”

“නමුත් ඔබේ ලිපිගොනුවේ සඳහන්ව තිබුනේ SLAN කියන නාමය.”

“ලිපි ගොනුව?? මොන ලිපි ගොනුවක්ද?? මම කොහොමද මෙතන්ට ආවේ”

“ඔබ ශ්‍රී ලංකාවෙන් කක්ෂ ගත කල චන්ද්‍රිකාව භාරව කටයුතු කල ප්‍රධාන ඉංජිනේරු ශිල්පියා.ඔබ තමයි චන්ද්‍රිකාව නිර්මාණය කරන්න සම්බන්ධ වුනු ලාබාලම ඉංජිනේරු ශිල්පියාත්... අභ්‍යාවකාශගත වීමට සුදුසුකම් සහ චන්ද්‍රිකාව සාර්ථක කරගැනීම සඳහා ඔබට සිද්ධවුනා අනෙකුත් අභ්‍යාවකාශගාමින් සමග අභ්‍යාවකාශගත වෙන්න.ඔබව අවශ්‍යව තිබුනේ චන්ද්‍රිකාව කක්ෂගත කල පසු එහි සන්නිවේදන කටයුතු නිසියාකාරව කරගැනීමටයි.ඒ නිසා ඔබව ශිශිරතාරක(hibernate) නින්දට පත්කර ගමනාන්තය දක්වා ඔබව සුරක්ෂිත කරන්නට තීරණයක් ගෙනයි තිබුනේ.අවාසනාවකට වායුගෝලයට ලඟාවීමට ප්‍රථමයෙන් ඔබ ගමන්කල ජෙට් යානයේ දෝෂයක් හේතුවෙන් ඔබ ඇතුළු පිරිසට ජෙට් යානයෙන් වෙන් වීමට සිදුවුනේ නියමිත වේගය ලබා ගැනීමට ප්‍රථමයෙන්.ඔබේ වාසනාවට ඔබ සිටි කුටිය වෙන්වී සයුරට වැටීමෙන් ඔබේ ජීවිතය සුරැකුණා.මේ වාර්තාව ඔබ දැන් සිටින කුටියේ තිබු ගොනුවකින්”

Isaac Newton's analysis of escape velocity. 

Projectiles A and B fall back to earth. 

Projectile C achieves a circular orbit,

D an elliptical one. Projectile E escapes.

මා කක්ෂගත වීම සඳහා පාලන මධ්‍යස්ථානයට පැමිණි අයුරු මට එක්වරම මතකයට පැමිණියේ එක්වරමයි.ඒ අවධිය රොකට් තාක්ෂණයෙන් තොර අභ්‍යාවකාශයට යෑමේ පරීක්ෂණ කෙරෙමින් පැවති අවධියක්.ජෙට් යානයක් හා සම්බන්ධ වූ ෂටලය,වායුගෝලය  සමීපයට ලඟාවී,වායුගෝලයෙන් මිදීමට අවශ්‍ය වියෝග ප්‍රවේගය(escape velocity)* ලබාගත් පසු ජෙට් යානයෙන් වෙන්ව වායුගෝලයට ඇතුලත්වීම මෑත කාලීනව සංවර්ධනය වූ රටක් වශයෙන් අතිශය ලාභදායි ක්‍රමයක් බවටයි හඳුනාගෙන තිබුනේ.නමුත් එපමණ ආරක්ෂාකාරි ලාභදායි ක්‍රමයක් අසාර්ථක වීම තවමත් අදහා ගත නොහැකියි.

“SL කියන්නේ SRI LANKA කියන එකට.මගෙ නම ASHAN NALAKA නිසා පණිවිඩ හුවමාරුවේ පහසුවටයි SLAN කියලා කෙටි කරගත්තේ.ඒත් දැන් මම ඉන්නේ ලංකාවේ ඉතින් කොහොමද ඔයාලා මගෙ විස්තර නොදන්නේ??”

“කලබල වෙන්න එපා අශාන් ඔයා දැන් ඉන්නේ අවුරුදු 2140.ඔබේ සැබෑ වයස අවුරුදු 148ක් වුනත් දිගු කාලීන ශිශිරතාරක නින්දක් ලැබීම නිසා ඔබගේ ශරීරයට වයස අවුරුදු 22ක් පමණයි.ඒ වගේමයි ඔබ අඳුනන කිසිවක් මේ වනවිට ජීවත් වෙන්න කිසිම සම්භාවිතාවක් නෑ.”

මා මාගේ ශරීරය දෙස නැවත වතාවක් අවධානය යොමුකලේ එවිටයි.එතෙක් වෙලා මා සංවාදයේ නිරතව සිටියේ නිරුවතින් බව දුටු විට උපන් ලැජ්ජාව නිසා සැඟවීමට උත්සහ කලේ නිරායාසයෙන්.

“ඔබ අවුරුදු 120ක්ම මේ රෝහලේ සිටියේ නිරුවතින්.පුරුෂ ශරීරය ගැන නිමක් නැති දේශන වලට පහුගිය අවුරුදු 20ක් 30ක් තුල ඔබ නිහඬ දායකත්වයක් ලබා දුන්නා.ඔබ ඉතා වටිනා නිදර්ශකයක්.ඔබේ නිරුවත ගැන දැන් කලබල වී තේරුමක් නෑ කියලයි මට හිතෙන්නේ.”

කිසිදු වදනක් නොපවසා ඇය පැවසූ දේ මා අසා සිටියේ ශෝකයත් ලැජ්ජාවත් කෝපයකුත් කැටි කරගනිමින්.නමුත් ඇය පැවසූ එක් වචනයක් නිසා මේ සියල්ලේම කුමක් හෝ වරදක් ඇතැයි නොසිතුනාම නොවේ....

“නිදර්ශකයක් කියලා ඔබතුමී මොකක්ද අදහස් කලේ.....??”

“ඔබ තමයි දැනට මේ ග්‍රහලෝකයේ ඉතිරිව ඉන්න එකම පිරිමි පුද්ගලයා”

“මො....කා....ක්...”

“ඔව් අශාන්.... ඔබ පමණයි දැනට අප සතුව ඉන්නේ.විවිධ තැන්වලින් පිරිමි පුද්ගලයින් කීපයක් තවමත් වාර්තා වුනත් ඔවුන් අල්ලා ගැනීම සෑහෙන්න අපහසුයි”

මාගේ හිතමිතුරන් නෑදෑයන් ආදීන්ගෙන් වෙන්වීම ගැන තරමක දුකක් සිතේ පැවතුනත් සමස්ථ පිරිමි වර්ගයා තුරන් වීම පිළිබඳව දැනගත් මොහොතේ දැනුනු තනිකම කිව නොහැකි තරම්.නෙත් යොමන සෑම ස්ථානයකම දකින්නට ලැබෙනුයේ කාන්තාවන් බැවින් මෙය සැබෑවක්ම බව පිළිගන්නට සිත බල කරන්නට විය.කෙසේ නමුත් මා හට ඉතිරි ජීවිත කාලය පුරාවටම විද්‍යාගාර මීයෙකුගේ කාර්යය භාරය කරන්නට සිදුවෙනු ඇතැයි නම් දැනෙමින් පැවතුණි.

“ඔවුන් අල්ලා ගැනීම අපහසුයි කියලා අදහස් කලේ මොකක්ද?? පිරිමින්ව සත්තුන්ගේ ගණයටද දාලා තියෙන්නේ”

“කරන්න දෙයක් නෑ අශාන්.... ඒකට ගොඩක් හේතු තියෙනවා.ඔබ දන්නවා ඇති ඔබ ජීවත් වූ වසර වන විට ගැහැණු පිරිමි ජනගහන අනුපාතය අතර සෑහෙන්න වෙනසක් පැවතුණු බව ඔබ දන්නවත් ඇති.ඒ කාලයේත් ලොව මුළු ජනගහනයෙන් ගැහැණු 65%ක් සිටි බවයි වාර්තා වෙන්නේ.ස්වාභාවික දරු උපත් නිසා ඇතිවන ප්‍රසව වේදනාව නිසා බොහෝමයක් කාන්තාවන් විවාහය ප්‍රතික්ෂේප කරමින් සමලිංගික සම්බන්ධතා වලට යොමුවුනා.පුරුෂ පාර්ශවයත් සමලිංගික සබඳතා සඳහා පිවිසීමත් ඒ සඳහා විශාල රාජ්‍ය අනුග්‍රහයක් ලැබීමත් නිසා තත්වය තවත් උග්‍ර වීමත් සමගම විද්‍යාගාරවල කෘතිම ගර්බාෂයන් තුල දරුවන් බිහිකිරීමට ක්‍රියාමාර්ග ගත්තා.අවසානයේ කාන්තා සංවිධාන වල කුමන්ත්‍රණ කිහිපයක් නිසා පිරිමි දරුවන් බිහිවීමට ශුක්‍ර බැංකුවල තිබූ ශුක්‍රානු අස්ථානගතවීම් ලොව පුරාම වාර්තා වෙන්න ගත්තා.”

 “මේක වෙන්න බැරි දෙයක්.... මේ දේ වෙන්න යන බව කිසිම රටක මිනිහෙක්ටවත් තේරුනේ නැද්ද?අඩුම ගානේ මේ වගේ සිද්ධි වාර්තා වෙනකොට ඉතිරිවෙලා හිටිය පිරිමියන්ව යොදාගෙන මේ තත්වය පාලනය කරන්න තිබුනනේ”

“ඒක එහෙම කරන්න තිබුනා නම් තමයි.නමුත් ඒ වන විටත් ලොව බලවත්ම රාජ්‍යන්වල ජනපති තනතුර පැවතියේ කාන්තාවන් අත.පුරුෂ සමලිංගිකයන් අතර ඉතා විශාල වශයෙන් රෝග වහනය වීමත් විවිධ මත්ද්‍රව්‍යයන් පානයත් නිසා ඔවුන් සෑහෙන අප්‍රාණිකත්වයකින් පෙළුනා.ඒ වන විට කිසිම රටක බුද්ධිමතුන් අතර පුරුෂයන් සිටියේම නැති තරම්.ඉතිරිවූ පිරිමින් පරිණාමයෙන් ආපස්සට ගිහින් ඇති බවක් දැන් පෙනෙමින් පවතිනවා....බොහෝ විට ඔබගේ සහයෝගයෙන් මේ ඇතිවූ තත්වය නැවත පෙර තත්වයට පත්කරගැනීමට හැකිවෙයි.”

“එහෙම පුළුවන් වෙයි කියලා හිතනවනම් ඇයි මෙච්චර කලක් බලාගෙන හිටියේ????? අවුරුදු 120ක්ම හිටියේ ඇයි...???”

“ඔබ භාවිතා කල ශිශිරතාරක පද්ධතිය අනතුර නිසා කාලය වෙනස්වීමකට ලක්වී තිබුණා.ඔබව අවදි කරවීමට උත්සහ ගත්තානම් බොහෝ දුරට ඔබගේ ජීවිතය අනතුරකට ලක්වෙන්නට තිබුනා.ඒ නිසා වසර ගණනාවක් තිස්සේ උපදෙස් ලැබී තිබුනා ඔබ අවදිවනතුරු සිටින ලෙසට.එතෙක් සෑහෙන පරීක්ෂණ සිදුවුණා.ඒ නිසා තමා මේ තරම් කාලයක් ගත වුනේ ඔබ ස්වාභාවිකව අවදි වෙනතුරු”

කුමක් කරන්නදැයි සිතාගත නොහැකිව මා ඉතාමත් අසරණ භාවයකට පත්වුණි.මැය කී දේ විශ්වාස කර මෙහි රැඳී සිටිනවාද එසේ නොමැතිනම් ඉතිරිව සිටින පිරිමි කණ්ඩායම් සොයා ඔවුන්ට එකතු වෙනවාදැයි යන විශාල ප්‍රශ්නය මා ඉදිරිපිට රැඳි තිබිණි.වෛද්‍යවරියට වාරු වෙමින් මා රෝහලේ වූ සයනයක් වෙත ඇවිද යන්නට වීමි.තවම හරි හැටි ශරීරය පාලනය කරගැනීමට නොහැකි බැවින් මොවුන් හා රැඳී සිටීමට සිදුවෙනු අනිවාර්යය...

අසල වූ ඇඳක් මත මා වාඩිකරවූ ඇය මා වෙත ලබාදුන්නේ කාන්තා ඇඳුමකි.යන්තමින් එය පටලවාගත් මම සයනයට දිගාවී අනාගතය පිළිබඳ කල්පනා කරන්නට වීමි.

“කොයිම වෙලාවකවත් මෙතනින් එළියට යන්න හිතන්න එපා....මොකද පිටස්තර ලෝකය පෙර තිබුණාට වඩා වෙනස්...  සමහරවිට ඔබට ජීවිතයෙන් වන්දි ගෙවන්නට වේවි.ඔබේම ආරක්ෂාව වෙනුවෙන් මේ කාමරේ දොර අගුළු දමන්න සිදුවෙනවා...”

ඇයගේ අවසන් වදන් කිහිපය ඉල්ලීමකට වඩා තර්ජනාත්මක ස්වරූපයක් ඉසිලීය.කුමක් විස්වාස කරන්නදැයි තවමත් සිතාගත නොහැක....වෛද්‍යවරිය ලබා දුන් එන්නත හේතුවෙන්දෝ දෑස් කෙමෙන් පියවෙන්නට විය.

ප/ලි

මේ කතාවට මූලික අදහස ආවේ අපේ අනූ අක්කගේ බ්ලොග් එකේ ගැහැණු ලමයි පිරිසක් එකතු වෙලා හදපු ගැහැණු ළමයි බ්ලොග් එක ගැන එයා සඳහන් කරපු නිසා.මට ඒක කියවද්දි හිතුනේ මේ කස්ටිය සෙට් වෙන්නේ කාන්තා ආධිපත්‍යයක් පතුරන්න කියලා ඉතින් මෙහෙම කතාවක් මැවුනා.මුලින් ඒ කස්ටියගේ නම් දාලා ලියන්න හිතුනත් පස්සේ හිතුනා එහෙම දාන එක හරි නෑනේ කියලා.කතාවේ හොඳ නරක අහගන්න කැමතියි.හිතෙන ඕනෑම දෙයක් කියලා යන්න මොකද ඒක මට ගොඩාක් වටිනවා.... 

පින්තූරෙ ගත්තේ මෙතනින් http://cache.io9.com/assets/images/8/2011/11/c83e479c4e613bcd390a036c8b2b9f2a.jpg